10 فبراير 2021 1104 0  

دليلك لفلانتين مثالي: حتى لو كنتي سينجل شهر فبراير بدأ و ده معناه ان الفلانتين داخل علينا و الحب سارح في الهوا! سواء كنتي مرتبطة او سينجل الفلانتين مناسبة لطيفة للاحتفال بيها، ممكن تكونى شايفه انه مناسبة مبتذلة لكن ايه رأيك لو حاولنا نغير المفهوم ده؟

ايه رأيك لو احتفلنا به عشان نظهر الحب واللطف مش بس لحبيبك او جوزك لكن لكل حاجة حواليكي حتى لحيوانك الاليف و أكيد اظهار الحب لنفسك انتِ؟
وبالمناسبة دي جمعنا لك أنشطة ممكن تعمليها في اليوم ده ممكن تضيف اللطف لكل اللي حواليكي سواء كنتِ في علاقة او سينجل:

1. يوم للسبا: حياتنا مليانة بالتوتر و بنحتاج نسترخي من وقت للتاني و مفيش حاجة ممكن تدي إحساس الاسترخاء زي تمضية اليوم في التدليك بـعلاجات السبا المختلفة. إحجزي ليكي و لشخص مهتمة به و ريحي أعصابك من التوتر.

2. رحلة في النيل: منظر المياه و هي بتتحرك بتحسس بعض الناس بالراحة و الهدوء. لو معندكيش دوار بحر ليه متريحيش اعصابك و تستمتعي بالهوا في اليوم ده انت و حد بتحبيه؟

3. موعد على العشاء: العشاء في مطعم فاخر حاجة لازم نعملها من وقت للتاني عشان ندلع نفسنا و خصوصاً في الفلانتين. البسي و تأنقي اليوم ده و شاركي حد بتحبيه وجبة لذيذة.

4. ليلة افلام ممتعة: للاشخاص اللي بيحبوا البيت زيي هتكون فكرة ليلة الافلام لطيفة بالنسبالهم. أختاري فيلم بتحبيه و اتفرجي مع الشخص اللي تختاريه مع شوية سناكس و مشروبات خفيفة. و دي أقتراحات لأفلام ممكن تعجبك في اليوم ده: - Blue Valentine - Nerve - This Means War - Bridget Jones’s Diary - 10 Things I Hate About You - No Reservation - How To Be Single 5. خبيز بيتي: أحياناً الطبخ بيكون نوع من أنواع العلاج النفسي - خاصة الخبيز- لانه بيخلي البيت دافي و مريح. أعملي كيك أو بسكويت حلو ليكي و للشخص اللي هتقضي معاه اليوم مع كوباية هوت تشوكليت واتكلموا مع بعض فى حاجات حلوة.

6. هدية لطيفة: المحلات كلها بتكون مستعدة للفلانتين عشان كده ده أفضل وقت تشتري فيه هدية لأي حد بتحبيه او حيوانك الاليف و أكيد لنفسك كمان لان زي ما قلنا اليوم ده هو يوم لأظهار الحب لكل حاجة حوالينا و خاصة -انتِ-

7. إسمعي مزيكا: سواء هتقضي اليوم ده برا في عشاء رومانسي أو هتقضيه في البيت مع وجباتك المفضلة المزيكا جزء مهم في اليوم. عشان كده عملنالك بلايليست تسمعيها اليوم ده و تستمتعي: https://play.anghami.com/playlist/204795394?bid=/NFuuZGLXHdb