01 أبريل 2020 1684 0  

من أكتر المشاكل شيوعاً عند ناس كتير هي مساحة الشقق الضيقة. الشقق الضيقة معتاها مساحة صغيرة للتخزين،ومساحة أصغر للابداع والديكور. الموضوع ده بيكون محبط جداً أحيانا،لأنك لازم تحسبي مقاس كل حاجة مهما كانت صغيرة عشان تتأكدي انها هتناسب المكان الي هتتحط فيه ومتاخدش مكان حاجة تانية أو أسوأ،يبقي شكلها وحش ومش في مكانها. التحدي الحقيقي في المساحات الضيقة هو انك تقدري تلاقي مكان لكل حاجة محتاجاها وفي نفس الوقت تخلي شكلها مريح وشيك.

من حسن الحظ ان دلوقتي بقي فيه حلول كتيرة لمعالجة مشكلة المساحات الصغيرة،سواء كان اثاث معمول مخصوص عشان يناسب الأمامن الضيقة،أو الأثاث الي معمول بوحدات تخزين داخلية وكمان وحدات التخزين المستخبية الي ممكن تتحط ورا قطع الأثاث او جنبها.كمان فيه حلول كتير ممكن تخليكي تستخدمي كل شبر في شقتك الضيقة،وفي نففي الوقت تخلي شكلها حلو. جمعنالك شوية من النصايح والحلول دي عشان نساعدك:

1- اختاري السراير الي فيها مساحة تخزين: السرير الي فيه مساحة تخزين هيساعدك تستخدمي مساحته احسن استخدام. حتي لو السرس مكنش معمول جواه وحدات تخزين، ممكن دايماً تستخدمي المساحة الي تحته وتحطي فيها شنط أو بساكت تخزين عشان تفضي مساحة اكبر في اوضتك.

2-  الرفوف،الرفوف، وكمان الرفوف: رفوف الحائط هي صديقك الصدوق في كل أوضة في شقتك الصغيرة. انتي ممكن حتي تعملي الرفوف دي بنفسك ومش هتاخد منك وقت خالص. ممكن تستخدمي الرفوف دي في غرفة المعيشة للكتب والصور، وممكن تستخدمها للديكور بانك تحطي عليها زرع وجمبه القطع الفنية المفضلة ليكي. وممكن تستخدمي الرفوف في المطبخ للتوابل،الميكروييف ولأدوات المطبخ بتاعتك.أما بالنسبة للحمام ، ممكن تستخدمي الرفوف عشان تحطي عليها منتجات العناية الشخصية بتاعتك ،وكمان ممكن تستخدميها لاضافة لمسة ديكور للحمام. وممكن تستخدمي الرفوف في أوضة الأولاد بانك تحطي عليها اللعب والكتب، أو في أوضة نومك لمساحة تخزين اضافية.

3- حطي حامل فوط الحمام فوق التواليت: لو كان حمامك صغير جداً،حامل الفوط هياكل من مساحته أكتر، علقي حامل الفوط فوق التواليت عشان تفضي مساحة لاستخدانم الحوائط .

4- استخدمي وحدات التخزين المقتوحة في مطبخك: وحدات التخزين المفتوحة بتخلي مطبخك يبان أكبر،ده غير انها بتضفي لمسة ديكور علي مطبخك. لوكان مطبخك في دواليب يالفعل، ممكن تحوليه لمساحة تخزين مفتوحة ببساطة عن طريق فك الضلف.

5- حطي أدراج بلاستيك في الدواليب العميقة:  من الأفكار الذكية لاستخدام الدواليب كويس هي انك نحطي الأدراج البلاستيك في الدواليب العميقز بالطريقة دي هتقدري تستخدمي الرف الواحد في أكتر من حاجة، ده غير انك هتقدري تلاقي الحاجات الي محتاجاها بسهولة من غير ما تضطري تقلبي الدولاب في كل مرة تحتاجي حاجة. استخدمي بساكت بلاستيك متينة عشان تعملي الادراج جوة الدواليب.

6- لو معندكيش مكان لكومود جمب السرير، استخدمي رف جمب السرير: علي أد ما الكومود الي جمب السرير مهم ومفيد،فيه أوض مبيكونش فيها مكان للكومود جمب السرير.في الحالة دي ممكن تستبدلي الكومود برف صغير في مستوي السرير،مش هيكون واسع زي الكومود طبعاً بس علي الأقل هينفع تحطي عليه الموبايل والمج .

 

7- استخدمي منظم الملابس في الأدراج: بالطريقة دي هيكون عندك مساحة أكبر في الدرج،ده غير انك برضه هتقدري تلاقي الحاجات الي محتاجاها أسهل. مش لازم يكون استخدام منظم الأدراج للملابس بس،ممكن كمان يستخدم في أدراج المطبخ عشان تنظمي الأطباق والبرطمانات الصغيرة.

8- استخدام ابواب الدواليب: ممكن تستخدمي أبواب الدوليب من جوة كمساحة تخزين أكبر. استخدمي الشماعات الي بتتلزق أو ثبتي حامل جوة الباب عشان تحطي عليه الأكسسوار والشنط وكمان الطرح،أو عشان تعلقي عليه أدوات المطبخ في دواليب المطبخ.

9- اخفي الأسلاك في الدرج: استخدمي درج من الأدراج عشان تخفي الاجهزة بتاعتك زي الراوتر او شاحن التليفو ن. حطي مشترك في الدرج من جوا عشان تقدري تحطي أكتر من جهاز فيه.

10- حولي منظم الملفات لرف: يتكلفة بسيطة جداً، ممكن تعملي رف لمساحة تخزين أكبر من منظم الملفات. الموضوع بسيط جداً وممكن تعمليه بنفسك.