21 يناير 279 0  

أنك تكوني إمرأة عاملة في أعمال مختلفة دايمًا بيتطلب أنك تلبسي بطريقة معينة. ده ممكن يكون محير، كمان لو أنتِ شخصية مترددة زيّ، ممكن تقضي حوالي ساعة محتارة بين إيه المناسب أكتر مع الچاكيت الچينز (دانيم): أبيض ولا أسود؟

كل نوع شغل بيحدد قواعد اللبس.

لو بتشتغلي في مكان بيمشي بقواعد غير رسمية (شركة كاچوال):

 ألبسي دانيم أو بلوزة أوتي-شترت مع نقشات بسيطة. أبعدي عن الألوان الفاقعة والبلوزات الضيقة أو المفتوحة. نفس الطريقة تنطبق على البنطلون: الچينز مسموح لكن مينفعش تلبسي چينز ضيق أو مقطع. الجيبات لازم يكون طولها عند الركبة. ممكن تلبسي كوتشي. الجزم المفتوح والصندل مسموح بيهم، لكن بقترح أنك متروحيش للحد ده. ألبسي أكسسوارات زي ما تحبي، لكن أفتكري أن البساطة دايمًا بتكسب.

لو بتشتغلي في شغل بيمشي بقواعد رسمية (شركة فورمال):

لو بتشتغلي في مكان بيتطلب طريقة لبس رسمية ده بيسيبك مع اختيارات محدودة. لازم تعتمدي على الألوان المحايدة زي الأسود والأبيض والرمادي والبني. ممكن تختاري بدل مع بنطلون أو مع جيبة أوقمصان وچواكيت وبنطلونات فورمال. الجزم المقفولة هى الاختيار الأنسب والتزمي بالألوان الهادية والنود. بالنسبة للأكسسوارات، بيكون مهني أنك تلبسي ساعات بجودة عالية أو أكسسوارات ملحوظة  لكن مش مشتتة للانتباه.

ودي أفكار للبس ممكن تساعدك في الأيام اللي بتكوني مستعجلة فيها:

- أحسن اختيار: چينز واسع وتي-شيرت مقلم وكاردجين بلون فاتح مع جزمة برقبة (بوت) أو كوتشي.

- جربي تلبسي بلوزة سادة مع چيبة بنقشة ورد. دايمًا هتخلي شكلك أنيق.

- بلوزة منقوشة مع چينز مقاسه مظبوط وكعب، لبس متواضع لكن شيك.

- فستان منقوش اختيار متاح مع كعب بلون هادي/ نود.

أتمنى تكون النصايح (الأفكار) مفيدة، وعايزة اعرف نصايحكم أنتم كمان.