18 أغسطس 239 0  

 

لفترة كبيرة من حياتي كنت بمر بمشاكل كبيرة متلاحقة وكانت كبيرة حتى على إستيعابي! وده أثر عليا بشكل سلبي في حاجات كتير؛ كنت دايمًا حاسة إني تايهه وقدرتي على التركيز قلت كتير وبقيت أنسى حاجات لسه حاصله قدامي وأنسى أحداث مهمة متتنسيش وكل ده كان بسبب الضغط النفسي اللي اتعرضتله. انا الحمدلله دلوقتي أحسن وبدأت أتعافى بالتدريج بس الفترة دي كانت السبب إني اعرف أهمية وجود الصحاب بالتحديد في حياتنا، لأن من غيرهم مكنتش هبقى أحسن.

أوقات كتير من كتر المشاكل والصراعات اللي بتواجهنا في الحياة وحتى صراعتنا الداخلية مع نفسنا بننسى فيها أحنا مين، أو ممكن منقدرش نكمل وبندخل في نوبات إكتئاب منعرفش نطلع منها لفترات طويلة. بس وجود شخص عارفك كويس وواقف جمبك بدون أي هدف غير إن هو "صاحبك" بيخليك تحس إنك مش لوحدك وده بيحسن من حالتنا المزاجية بشكل كبير وبيساعدنا نتجاوز مشاكلنا.

الصداقة هي أرقى العلاقات الإنسانية

أنا عندي إقتناع تام إن الصداقة هي أرقى علاقة بندخلها في حياتنا لو كان أساسها صح لأن طبعًا في مننا كتير قابلوا صحاب مصالح في حياتهم. لكن الصداقة الحقيقية هي من أفضل العلاقات في حياتنا لأن صاحبك ده مش حد من أهلك أنتوا مترابطين بالدم بينكم ولا هو زوج أو زوجة كل واحد مستني من الشخص التاني حاجة معينة يقدمهاله، دي علاقة دخلتوها وانتم مفيش حاجة مستنيينها من بعض لكنها بتبقى السبب إنك تحس إنك مش لوحدك.

الصداقة مش بس بتكون كتف نتسند عليه وقت مشاكلنا وضعفنا، الصداقة الصحية ليها أكتر من تأثير إيجابي على حياتنا فمثلاً:

• الصحاب بيحسنوا من صحتنا الجسدية
  في دراسة اتعملت في 2010 بتقول ان الناس اللي عندهم روابط صداقة قوية بتقلل من الشعور بالوحدة واللي بدورها بتحمي من مخاطر الموت المبكر.
  الإحساس بالوحدة بيخلينا نعمل كل حاجة بالعافية وبيدخلنا في حالات اكتئاب دايمًا لكن مع وجود صحاب في حياتنا الأحساس ده بيقل كتير. مش مهم عدد الصحاب المهم قيمتهم في حياتك. في فترة كبيرة من حياتي مكنتش اقدر اقول على حد انه صاحبي غير على بنت واحدة بس، ومع ذلك مكنتش متضايقه عشان وجودها في حياتي كفاية.
• الصحاب بيساعدوكي تبني ثقتك في نفسك
  كلنا بتعدي علينا لحظات شك وقلة ثقة في النفس لكن وجود صحاب بتدعمك دايمًا بيساعدك تبني ثقتك في نفسك وتحبيها.
  كتير ممكن تكوني حسيتي إنك مش واثقه في الشغل اللي بتقديمه أو حسيتي إن شكلك مش حلو في العموم ولاقيتي حد من صحابك بينفيلك المعلومة دي بكل الطرق الممكنة بكلام جميل بيزود ثقتك في نفسك.
• الصحاب سبب في تقليل من مستويات التوتر

في أوقات هتعدي عليكي هتكوني متوترة ومش عارفه تعملي ايه لأي سبب من الأسباب، مناسبة مثلاً وخايفه بسببها. لكن وجود شخص تقدري تعتمدي عليه وعارفه انه هيكون جمبك في الوقت ده بيقلل جداً من مستويات التوتر عندنا لأننا عارفين ان مهما حصل في حد بيدعمنا وفي ضهرنا

• الصحاب بيساعدوكي تكوني النسخة الأفضل منك
  في مثل شعبي قديم بيقول "الصاحب ساحب" أنا مقتنعة جداً بالمثل ده لأن صحابنا بنقضي معاهم وقت كبير وبنشاركهم ايامنا. فلو اختارتي صحابك ناس لطيفة، خيرة، بيعرفوا يستمتعوا وعندهم صفات كتير جميلة هتلاقي نفسك بتاخدي منهم مع الوقت والعكس صحيح طبعاً، فاختاري كويس صحابك.

 

تكوين صداقتنا ممكن يبدأ بأكتر من طريقة والطفهم على الإطلاق هي واحنا صغيرين لما نروح ونسأل حد قابلناه في النادي أو المدرسة أو العمارة "ممكن نبقى صحاب؟"
لكن ممكن تقابلي صحابك في الكلية، في الشغل، في أي نشاط بتعمليه أو السوشيال ميديا بس المهم أن لما تقابلي صحابك تعرفي تتعاملي معاهم صح وتديهم وقت في حياتك وتختاري صحاب تقدري تثقي فيهم وفي وجودهم جمبك وتقدري تسمعيهم وقت ما يحبوا يتكلموا وتتحكمي في اعصابك وكلامك وقت الزعل عشان متخسريهمش. 

الصحاب اللي بجد هما احلى حاجة في حياتنا وهما مصدر الدعم لينا وبنقدر نستمتع معاهم بوقتنا ونلاقي كتف نتسند عليه وقت حزننا وبيضيفوا لشخصيتنا كتير ووجودهم في حياتنا مهم و وجودنا في حياتهم كمان مهم.

شكراً لأصحابنا أنهم في حياتنا وهسيبكم مع اكتر تراك بحبه بيتكلم عن الأصحاب ومستنياكم تحكولي عن تأثير صحابكم في حياتكم.

 

https://soundcloud.com/52sarahreda/oa2c7ml9wfhv?utm_source=clipboard&utm_medium=text&utm_campaign=social_sharing