10 مارس 2020 1777 0  

لو الدكتور قالك ان حيوانك الأليف بيفقد نظره،أو لو قررتي تتبني حيوان أليف أعمي، في شوية حاجات بسيطة ممكن تعمليها عشان تساعديه يتأقلم علي حياته الجديدة

1. متعمليش تغييرات مفاجئة في نظام البيت: حيوانك الأليف هيتعلم يعرف طريقه في البيت حوالين الأثاث و من خلال الأبواب بالتدريج،فحاولي تخلي كل حاجة بنفس ترتيبها عشان متلخبطيهوش.

2. متغيريش مكان طبق الأكل والمياه بتوعه: تغيير مكان طبق الأكل والشرب لمكان جديد ممكن يلخبط حيوانك الأليف.ونفس الكلام بالنسبة لليتر بوكس.ساعدي حيوانك الأليف يتجنب الحوادث أو يجوع بانك تخلي حاجته دايماً في مكانها.ولو احتجتي تغيري مكان الحاجة،ساعديهم يوصلوا لمكانها الجديد كذا مرة لحد ما يتعودوا علي مكانها الجديد.

3- جهزي بيتك لحالة حيوانك الاليف الجديدة: اتأكدي ان البيت مفيهوش حاجة خطر علي حيوان أعمي.حركي الأثاث الي ليه زوايا حادة واتأكدي ان أسلاك الكهرباء بعيدة عن طريقه.

4. كوني عينيه في الشارع أو الجنينة: لما تخرجي كلبك الأعمي للتمشية برة،خلي بالك من أي حاجة ممكن تكون خطر عليه،زي الأشواك او الأسطح الغير مستوية.كمان خلي السلسلة قصيرة دايماً عشان تقدري بسهولة تساعديه في الطريق.

5. ساعديه باستخدام حواسه التانية: ممكن تساعدي حيوانك الأليف يتحرك في البيت باستخدام باقي الحواس. زي استخدام علامات عن طري الروايح،زي ما بتقول كارولين ليفين،مؤلفة كتاب " الحياة مع كلب أعمي" ممكن تستخدمي زيوت عطرية اساسية عند مكان نومه مثلا وعند باب الخروج.

ممكن كمان تستخدمي أجراس الرياح علي الباب الخارجي عشان ترشديه للعتبات.وممكن تستخدمي مشايات بخامات مختلفة تحت اطباق الأكل والشرب والليتر بوكس.

تحفيز حواس حيوانك الأليف مش بس مهم عشان يساعده يتحرك في البيت  ويبعد عن الخطر،لكن كمان عشان صحته الجسدية والنفسية.

"كتير من الكلاب الي بتفقد بصرها ،بتميل لأنها تقعد في مكان واحد ومتتحركش" زي ما بتقول ديبي باور، مؤلفة كتاب "خلال الصمت المظلم: الحياه مع كلبك الأعمي وحبه"

6. عرفيه علي الأغراب والحيوانات الأخري بالتدريج: الحيوانات الأليفة العمياء بيميلوا للاحساس بالضعف حوالين الغيرمألوف، زي الأغراب، الأماكن الجديدة والحيوانات التانية.بياخدوا وقت عشان يفهموا ان الحاجات الجديدة دي مش بتهددهم.

7. الحيوانت الأليفة العمياء بتتخض بسهولة: اتكلمي معاه قبل ما تلمسيه.ممكن كمان تلبسي انسيال أو سلسلة بتعمل أصوات عشان دايما يعرف مكانك فين،اما بالنسبة للحيوانات التانية الي في البيت، ممكن تحطي جرس صغير علي رقبتهم عشان حيوانك اللأليف يعرف لما يقربوا منه.

8. ساعدي حيوانك الأليف يلعب: الحيوان الأليف العمي بيحتاج يلعب زي الحيوان الطبيعي بالظبط.اختاري مكان مفتوح و آمن ليه عشان يقدر يجري ويلعب بحرية،استخدمي لعب الكلاب الي بتعمل صوت عشان تحدفيها ويقدر كلبك يعرف مكانها ويجيبها.أو اربطي لعبة بتعمل صوت في عصاية ولاعبي بيها قطتك.

الاهتمام بحيوان أليف أعمي بيحتاج مجهود كبير ومستمر،بس ممكن انتو الأتنين تتأقلموا علي الظروف والحياة الجديدة بالحب والصبر.