05 سبتمبر 2022 470 0  

<<الليلة واللي فيها>> مسلسل جديد من إنتاج شاهد بطولة زينة، أبيوسيف، علاء مرسي، محمد شاهين وسماح أنور.

المسلسل من أول حلقتين باديء بداية قوية، صادمة، جريئة ومشوقة. زينة قالت إنها بتصالح الجمهور بالعمل ده، وده حقيقي لأن زينة قدرت تقدم تمثيل حقيقي وجريء وقدرت تبين قد ايه هي في اضطراب نفسي كبير بين الماضي والحاضر.

لكن النهاردة احنا مش هنتكلم عن روعة الأداء التمثيلي لكل بطل أو قوة السيناريو والإخراج ولكن هنتكلم عن فكرة المسلسل اللي تقريباً مفيش أي عمل درامي مصري أتكلم عنها قبل كدة.

 

المسلسل بيتكلم عن التروما أو الصدمة النفسية اللي اتعرضت ليها البطلة في سن صغير وخلت عندها اضطرابات نفسية من أهمها واللي ظاهر بقوة في المسلسل هو الاضطراب الجنسي (المازوخية). الصدمات النفسية اللي ممكن أي إنسان يتعرض لها بتكون بسبب حدث أثر على الشخص بشكل سلبي زي حوادث الطرق، التحرش، الإغتصاب، الحرب أو في حالة مسلسل الليلة واللي فيها الحبس وتخلي الأب عن بنته.

مش كل الناس بتتأثر بسبب الصدمات النفسية بنفس الشكل، في ناس بتقدر تتعافى بشكل أسرع وناس بيفضل ملازمهم أحساس الصدمة لمدة أطول و بيحتاجوا وجود أشخاص جمبهم عشان يقدروا يعدوها.
وفقاً لموقع Medical News Today الصدمات النفسية بتأثر على الشخص بأكثر من شكل:

• الشعور بالذنب أو اللوم 
• النسيان
• الشعور بالانفصال والغرابة عن الناس
• صعوبة التركيز والانتباه
• الاكتئاب، الفوبيا، القلق والتوتر
• خلل في النوم
• أو في حالة الليلة واللي فيها، الأحساس بالدونية و الرغبة في الشعور بالألم (المازوخية)
  
  
  

في أكتر من شكل للاضطرابات الجنسية لكن أسبابها مختلفة، منها:

• صدمات الطفولة
• قلة احترام الذات 
• مشاكل العلاقات الأسرية
• الاضطرابات النفسيه زي القلق والاكتئاب

طب هل كل الميول الجنسية الغير طبيعية بتكون اضطراب جنسي؟ 

الإجابة لا، مش كل ميل جنسي مختلف عن الطبيعي بيكون اضطراب جنسي ولكنها تفضيلات

الصورة من فيلم درب الهوى - أنا عايز واحدة تهزقني تهزقني تهزقني.

اما الاضطرابات الجنسية بتخلي الشخص يحس بالاكتئاب أو العار من نفسة بسبب رغبته وده اللي بيتم مناقشته في المسلسل، المازوخية وعلاقتها بصدمات الطفولة.

الشخص المازوخي بيستمتع بالمعاناة والألم سواء ألم نفسي عن طريق الشتيمة والتقليل من الشخص أو ألم جسدي والرغبة في التضحية المبالغ فيها.

ولفترة كبيرة جداً كان في إعتقاد سائد وسط العلماء والناس أن الست بس هي اللي بتحب المازوخية وبتسمتع بيها سواء من خلال التحكمات اللي بيفرضها الراجل عليها أو من خلال الاستمتاع بده في الحياة الجنسية عامة وكمان وصل بيهم الأفتراض أن هي دي الطبيعة اللي اتولدت بيها الستات وبرروا ده بأنها بتحب الطفل حتى بعد معاناة ألم الولادة!
لكن الكلام ده مش صحيح لأنهم رصدوا مجموعة كبيرة من الرجالة بيتلذذوا بالإحساس بالألم من البنت اللي بيحبها أو مراته سواء عن طريق الشتيمة أو الضرب أو رغبته بأنها تخونه عشان يحس بالألم النفسي وكتير مننا شاف الرسايل من نوعية (نفسي أبقى خدامك).
المازوخية ممكن تبقى ميل طبيعي أو بسبب، وبتختلف الأسباب دي بين:

• الأعتداءات الجنسية سواء تحرش أو أغتصاب
• التربية على الطاعة العمياء 
• توبيخ وضرب الطفل دايمًا 
• إحساس الشخص أنه غير كافي

الشخص المازوخي بينجذب للعلاقات المؤذية وبيفضل يتحمل الألم والاحتقار من غير ما يبين أنه بيتألم لأنه بيحس إن هي دي طريقتة للشعور بالفخر بنفسه أنه تحمل كل الألم والأذى اللي يتعرض له.

المازوخية بسبب الصدمات النفسية ممكن تتعالج من خلال العلاج النفسي بكل سهولة المهم الشخص يكون عنده وعي كافي إن اللي بيمر بيه ده بسبب صدمات نفسية تانية.

احكولنا متحمسيين تتابعوا المسلسل ولا لا؟