11 يونيو 2020 1744 0  

الطين موجود بألوان كتير، وكل لون فيها بيوضح مكونات الخلطة وفوايدها وبالتالي بيحدد سبب استخدامه و الحالات الي بيعالجها.

فيه أنواع كتير للماسكات المصنوعة من الطين، وعشان تعرفي الفرق بين الأنواع المختلفة للماسكات دي هنتكلم عنها في خطوات بسيطة تساعدك تختاري النوع المناسب لبشرتك.

أولاً: الطين الأخضر

الطين الأخضر بيستخدم للبشرة الدهنية لأنه بيمتص الزيوت من الجلد وبيعدل من انتاجها.ده غير انه عنده قدرة شفائية ممتازة وبالتحديد لحب الشباب والحبوب الدهنية.

عشان تعملي ماسك من الطين الأخضر : أخلطي ملعقتين كبار من الطين الأخضر مع أربع ملاعق مياه دافية،وقلبيهم لحد ما يبقي الخليط طري وسهل فرده علي البشرة. سيبي الماسك 20 دقيقة علي وشك وبعدين اشطفيه بمياه فاترة. كرري الماسك مرتين في الأسبوع .

ثانياً: الطين الأبيض

الطين الأبيض بيقوي الجلد وينشطه، وممكن يستخدم للبشرة الجافة وكمان الشعر الجاف لأنه بيعيد الطراوة والنشاط للبشرة. ده غير انه النوع الأكثر نعومة وده اللي بيخليه يناسب كل أنواع البشرة حتي البشرة شديدة الحساسية.

عشان تعملي ماسك للبشرة من الطين الأبيض:  أخلطي ملعقتين كبار من الطين الأبيض مع أربع ملاعق مياه دافية وملعقة عسل ،وقلبيهم لحد ما يبقي الخليط طري وسهل فرده علي البشرة. سيبي الماسك 20 دقيقة علي وشك وبعدين اشطفيه بمياه فاترة. كرري الماسك مرتين في الأسبوع .

و عشان تعملي ماسك للشعر من الطين الأبيض: أخلطي أربع ملاعق  كبار من الطين الأبيض مع كوباية زبادي كبيرة وقلبيهم لحد ما يبقي الخليط طري وسهل فرده علي الشعر. سيبي الماسك ساعتين علي شعرك وبعدين اغسليه بالطريقة المعتادة. كرري الماسك مرتين في الأسبوع لتغذية شعرك والمساعدة علي انه يكون ناعم ولامع.

ثالثاً: الطين الأحمر

الطين الأحمر بياخد لونه من قوة الحديد في مكوناته،وده الي بيخليه غني بالمواد الضرورية للجسم. بينشط الدورة الدموية في العروق الصغيرة الي بتظهر علي سطح البشرة. والنوع ده بيستخدم للبشرة اللي بتظهر عليها الخطوط الحمرا الرفيعة،وكمان بيستخدم  لكل أنواع البشرة بما فيهم البشرة الحساسة.

عشان تعملي ماسك للبشرة من الطين الأحمر: أخلطي ملعقتين كبار من الطين الأحمر مع أربع ملاعق مياه دافية،افردي  الخليط علي بشرتك بفرشاة نضيفة. سيبي الماسك 20 دقيقة علي وشك وبعدين اشطفيه بمياه فاترة.

رابعاً: الطين الزهري

الطين الزهري مثالي للبشرة الحساسة لأنه مزيج من الطين الأحمر والأبيض، وهو غني بالفيتامينات والأملاح المعدنية، ده غير انه علاج رائع للبشرة الحساسة الي بتعاني من مشاكل الاحمرار أو التهيج الجلدي.

عشان تعملي ماسك للبشرة من الطين الزهري:  أخلطي ملعقتين كبار من الطين الزهري مع أربع ملاعق مياه دافية،وزعي الخليط علي بشرتك. سيبي الماسك 20 دقيقة علي وشك وبعدين اشطفيه بمياه فاترة.كرريه مرتين في الأسبوع.

خامساً: الطين الأصفر

أما الطين الأصفر فبيستخدم للبشرة المتقدمة في السن، وده لأنه غني بالمنجنيز اللي بيحفز انتاج الكولاجين، وكمان الحديد الي بيمد الخلايا بالأكسجين واللي بيعتبر مضاد طبيعي للتجاعيد وبيساعد في اعادة النشاط للبشرة..

عشان تعملي ماسك للبشرة من الطين الأصفر:  أخلطي ملعقتين كبار من الطين الأصفر  مع ملعقتين مياه دافية وملعقتين ماء ورد،وزعي الخليط علي بشرتك وبالتحديد الوش والرقبة والكتف لإعادة تجديد الخلايا في المناطق دي. سيبي الماسك نص ساعةعلي جسمك وبعدين اشطفيه بمياه فاترة.

و ممكن كمان تستخدمي الطين الأصفر علي الشعر مع زيت الخروع لتقوية الشعر الضعيف والمتعب. كرري الماسك مرتين في الأسبوع لتغذية شعرك.

سادساً: الطين البحري

النوع ده من الطين بيتميز بقدرته علي الحفاظ علي ليونة الجلد، وبالتالي حمايته من التجاعيد الي بيكون سببها الرئيسي جفاف البشرة ونقص المعادن الاساسية فيها. وهو مثالي للتخلص من البقع الداكنة أياً كان مكانها في الجسم.

عشان تعملي ماسك للبشرة من الطين البحري:  أخلطي كمية من الطين البحري مع نفس الكمية من عصير الليمون و ملعقة زيت لوز، افردي  الخليط علي بشرتك وسيبيه نص ساعة بعدين اشطفيه بمياه فاترة. استخدمي الماسك ده يوم ويوم لأحسن نتيجة.