08 ديسمبر 2022 349 0  

                                       الزم حدودك!

 

كتير مننا بيستخدم التعبير ده وهو بيتخانق ومتعصب، بس عمرنا فكرنا ايه هى الحدود اللى فعلا محتاجين نوضحها لنفسنا وللى حوالينا؟ وايه لازمه الحدود ف حياتنا؟

وايه الفرق بين الحدود الصحية والحدود السيئة؟ كل دى أسئلة مش كتير مننا سألها لنفسه قبل كده، ف تعالوا نعرف سوا ايه حكاية الحدود دى؟

وايه أصلا أنواع الحدود؟ فى 4 أنواع منهم وهم الحدود الجسدية، الحدود الأخلاقية، الحدود العاطفية، الحدود الروحانيه.

و مبدئيا كده بنعرف ان احنا حاطين حدود صحية لما نحس اننا فى أمان على كل المستيات واننا مبنتعرضش للاستغلال ولا التطفل مبنحسش بالذنب تجاة أى شخص ف حياتنا لمجرد اننا بنراعى نفسنا ونحافظ على طاقتنا، ف انتاجيتنا تزيد وطاقتنا تعلى ونحس سعادة حقيقية فى حياتنا، وبتحس انك قادر تحترم نفسك وقادر تقدرها، ونتيجة ده كله بتعرف تبنى علاقات صحيه مع اللى حواليك.

طيب والحدود السيئة؟ دى اللى ببساطة بتحس فيها بالذنب والعار والاستياء فى علاقاتك، ودايما هتحس انك مرهق ومسجون لدرجة ممكن يجيلك اكتئاب أو قلق وتدهور الحياة على كل المستويات، وخليك عارف ان لما الحدود تتشال محدش هيحبك زيادة أو يحترمك زيادة، بالعكس هتبقى مستباح من اللى حواليك، وحتى انت مش هتقدر تحترم نفسك.

طيب كده عرفنا انواع الحدود والفرق بين الحدود الصحية والحدود المسيئة، السؤال المنطقى بعد كده أحط الحدود ازاى؟ أبسط طريقة هى انى أكون واضح وصريح متكسفش أصرح عن اللى بيضايقنى لأن ده حقى.

واتعلم أقول "لأ" لأى حاجة بتزعجنى فعلا وتمتص طاقتى، ومتستناش ان اللى حواليك يقبلوا ده بسهوله، بالعكس هيرفضوا كذا مره وهيتعمدوا يحسسوك بالذنب أو ينتقدوك، المهم هنا انك تُصر على حدودك كذا مره وتأكد عليها لحد ما تتحقق على رض الواقع ومتتهزش بردود أفعال اللى حواليك.

طيب ده بالنسبة للناس اللى حواليك، بالنسبة بقى لحدودك مع نفسك هتحققها ازاى؟ وايه هى أصلا الحدود اللى عاوز تحطها لنفسك؟ هل انت محافظ على حدودك مع نفسك ولا انت كمان بتستبيح نفسك؟

حدودك مع نفسك بتتلخص فى انك تشتغل على تقويم نفسك فى كل مستويات حياتك وتكون ملتزم تجاه نفسك بالأشياء والأفعال اللى تسعدها وتخليك أحسن فى كل شئ.

يعنى أشهر مثال على ده انك تلتزم فى صحتك بانك تاكل أكل جسمك محتاجة فعلا، انك تعمل نشاطات بتحبها سواء رياضة أو فنون ف انتاجيتك تعلى لأنك بقيت سعيد وقادر تحقق الأهداف اللى حاططها لنفسك سواء قصيرة المدى أو بعيدة المدى.

ف الحدود مش مقتصرة على انك تحطها للى حواليك بس، بل انك لما تلتزم فى حدودك مع نفسك هيبقى سهل انك تلزم اللى حواليك بحدودك.