15 أغسطس 2022 488 0  

أنواع الشخصيات اللي بنصادفهم خلال رحلة حياتنا كتيرة جدًا، منها الشخصيات المؤذية والشخصيات اللي عكس كده، بس يمكن من أكتر الشخصيات أذى هي الشخصيات السامة. ناس كتير دلوقتي بتلاقي إن أي حد بتعرفه بيطلع في النهاية واحد من الشخصيات السامة دي، وبيتفاجئوا بيهم رغم إنهم عارفين من البداية، وبيبتدوا يدخلوا في حالة من الحزن بسبب علاقاتهم المتشابهة والمتكررة، وبيلوموا نفسهم وسط اسئلة كتير عن إنهم ناس وحشة عشان كده مش بيتحبوا، بس هل الناس دي فكرت قبل كده إنه ممكن يكونوا هما اللي بيجذبوا الشخصيات دي ليهم؟ وإنهم في الحقيقة معجبين بالشخصيات دي وحابين يخوضوا معاهم مغامرة جديدة؟
للأسف ده حقيقي، وكتير من الناس فعلًا بتجذب الشخصيات دي ليهم وبتحبهم حتى لو عارفين في الآخر إنهم هيتجرحوا. ويمكن جزء كبير من أسباب ده إن بعض الأعمال الفنية المحلية والعالمية ابتدت تبين أبطالها من الأشخاص السامة في شكل جذاب ومميز، وده بالفعل أثر في كتير من اختياراتنا لدرجة إن كلمة "الشخص التوكسيك" بقى بيتم تناولها بشكل كبير في يومنا.

الشخصيات السامة اخدت الاسم ده من منطلق إنهم بيدسوا السم في حياة اللي حواليهم وبيأذوهم بشكل واعي أو بشكل غير واعي. من صفات الشخصية دي إنها بتفضل مصلحتها على مصلحة الطرف الآخر وبيسحبوا طاقتهم الإيجابية، وكمان بيستنزفوا طاقة ومشاعر الطرف التاني. تأثير الأشخاص السامة على حياتنا تأثير كبير وسلبي بيعادل التعرض للمنبهات لإنهم بيأثروا على طاقتنا وبيحطونا تحت ضغط كبير. وده بحسب دراسات عملتها جامعة ألمانية اسمها "فريدريش فيلر". وفيه مجموعة من الصفات أو العلامات اللي ممكن تحدد بيها شخصية سامة في حياتك زي النرجسية، قلب الترابيزة، مستنزف للمشاعر، مش بيعتذر، دايمًا مقتنع إنه الطرف الصح، انتقاد الطرف الآخر، وغيرهم كتير من الصفات اللي بتدل على إنك بتتعامل مع شخصيات غير سوية.

الشخصيات السامة عادةً بيبانوا كشخصيات قوية وجذابة، وده من الطبيعي يكون شئ جذاب ومبهر للي حواليهم، وده اللي بالفعل بيحصل إنه ناس كتير بتحب تقرب منهم. هنتكلم دلوقتي عن بعض العلامات اللي هتخليك تعرف ليه بتجذب الناس السامة في حياتك خصوصًا في العلاقات العاطفية:

- لو انت شخصية بتشوف الجزء الكويس في الناس:
بعض الأشخاص تركيبة شخصيتهم بتخليهم يبصوا للجانب الكويس اللي في الناس، ويبرروا أفعال الشخصيات السامة دي بإنه الشخصيات دي عندهم جانب كويس باصينله. وده بيخليهم دايمًا يتقبلوا الأفعال السيئة اللي بتحصل فيهم والأذى اللي ممكن يتعرضوله بحجة إن الشخص ده عنده جانب كويس.

- لو بتؤمن إنك تقدر تغير الناس:
ناس كتير وظيفتها وأسلوب حياتها بيمنحوهم الفرصة والعقل والحكمة إنهم يغيروا حياة الناس، زي الأطباء النفسيين، وهنا الموضوع بيكون طبيعي وبيكون كمان شئ إنساني راقي جدًا. إنما بعض الناس بيبقوا مقتنعين إنهم يقدروا يغيروا حياة الطرف التاني للأفضل ويعيشوا معاهم بعدها في حب وسلام مع شخصياتهم الجديدة. وفيه كمان ناس بياخدوا الموضوع كتحدي وبيدخلوا في مخاطرة القرب من الناس دي لأنهم بس مقتنعين إنهم هيقدروا يغيروهم.

- لو مش بتدور على علاقة جدية:
لو انت شخص مش بتدور على علاقة جدية ده هيديك المساحة إنك ترتبط بشخص مافيهوش مواصفات "شريك الحياة"، وبيديك الرغبة والمساحة في إنك تعيش مغامرة مع الشخصيات السامة.

في النهاية كلنا ممكن نغلط في طريقة حكمنا على بعض الأمور، ممكن نغلط في اختياراتنا، بس الأهم مانغلطش في حق نفسنا!