21 أبريل 2020 3663 0  

علي مر الزمن الستات اشتغلت كل حاجة يقدر الراجل يشتغلها بالرغم من الاعتقاد الخاطئ ان في مجالات متنفعش للستات. شوفنا ستات كتير كسروا القالب ده و تألقوا في ناسا و ورش العمل اليدوي و في الشوارع. انهاردة هنقابل واحدة مش عادية من ستاتنا المصريين: شاهيناز حسين. شاهيناز اسم معروف في مجال السيارات كصحفية و مختبرة قيادة. و كمان اسست شركة لتقديم محتوي و مديرة عمليات في شركة تانية. انهاردة قابلناها و اتكلمنا معاها عن حياتها الملهمة و ازاي قدرت تقف علي رجلها و تبقي في مكانها انهاردة.

 

مبسوطة جدا انك معانا انهاردة، احكيلنا شوية عن نفسك. عندك كام سنة؟ بتشتغلي ايه  بقالك قد ايه بيهايند زا ويل ؟

انا عندي 34 سنة. باشتغل في 3 وظايف: صحفية سيارات في جريدتين مصرييتين، و بادير العمليات في شركة عندها ابليكيشن ارتباط اونلاين، و اسست مؤسسة بتقدم خدمات اعلامية و محتوي من سنتين. و شغالة فريلانسر في كذا مشروع تانيين. جيرل بيهايند زا ويل عمره سنتين و نص.

 

 

كلمينا اكتر عن جيرل بيهايند زا ويل بدأ ازاي؟

الموضوع بدأ بعيلة بتحب العربيات. طول عمري حواليا عربيات. والدي و اخويا كانوا شغوفين بالسيارات ز اشتغلوا في المجال فريلانسنج، اثروا عليا بشكل كبير و وفرولي فرص كتير اشوف و اسوق عربيات مختلفة من و انا صغيرة. من عمر 7 سنين و انا شغوفة بالكتابة، فكان طبيعي اني اكتب عن العربيات في بداية شغلي في 2004، و من ساعتها مبطلتش.

 

حلو اوي. كان رد فعل الناس حواليكي ايه لما قررتي تبدأي صفحة علي الفيسبوك؟

كان شئ طبيعي اني اشتغل اونلاين و انا صحفية بقالي اكتر من 12 سنة. اليومين دول الناس بتبعد عن الجرايد و بتروح للسوشيال ميديا، فكانت مسألة وقت ان انا كمان اتجه للسوشيال ميديا.

و ازاي استقبلوكي في مجتمع اختبار السيارات بما انه معظمه رجالة؟

الناس لسه بتتخض لما بيلاقوا بنت مهتمة بالطريقة دي و عندها شغف بالعربيات. بس انا عمري ما اتعرضت لاستقبال بايخ من زمايلي الرجالة و بيحترموني جدا، دول كمان بيدعموني و بيدوني فيدباك ايجابي جدا. علي فكرة انا معظم متابعيني رجالة مش ستات.

 

و منافسينك الرجالة بتتعاملي معاهم ازاي؟

مجالنا مش محكوم بالمنافسة بالعكس، معظم الناس في مجالنا صحاب و كلنا بنشتغل سوا. لما بنكون في ايفينت او بنختبر عربية بنساعد بعض بالكتابة و التصوير. البيئة ودودة جدا.

 

و الناس القريبين منك بيدعموكي؟

 طبعا! مكنتش هاوصل مكاني دلوقتي لولا دعمهم.

 

طيب ايه التحديات اللي بتواجهيها علي كدة؟

اقناع الناس اني باعرف اسوق و اني مش هاعمل حادثة بعربياتهم.

في النهاية، حابة تقولي حاجة للبنات و الستات في مصر؟

انهم بس ميصدقوش اي حد يقولهم انهم مش هيقدروا او مش المفروض يعملوا الحاجة اللي هما عايزينها. متصدقهمش لما يقولولكوا ان دي شغلانة راجل. لو عندك حلم افضلي وراه لحد ما تحققيه.

 

و المجتمع؟ حابة تقوليله حاجة؟

اني مقدرة كل الدعم و الحب اللي بيوصلني من المجتمع بتاعي و اني دايما هاعمل كل اللي اقدر عليه عشان اردلهم الدعم.

 

اتبسطنا بحوارنا مع شاهيناز و نتمني تكون الهمتكوا زي ما الهمتنا. بنشجع شاهيناز حسين و اي بنت بتسعي علي حلمها. احنا فخورين بيكوا.

شاركونا اراءكوا في الكومنتات.