01 ديسمبر 2022 542 0  

فاكرة أول خاتم في حياتك؟ المشاعر و الابتسامة اللي شاركتيها مع الشخص اللي ادالك الخاتم ده، ممكن تكوني لسة فاكرة كنتي لابسة ايه يومها وكل تفصيلة شوفتيها اليوم ده، ممكن تكوني بتحكيها للناس اللي بتحبيهم دلوقتي و اتحفرت في ذاكرتهم وهيحكوها لأولادهم في يوم من الأيام.

الذكريات و المشاعر ممكن تدوم طول العمر، ومن الفكرة دي بدأ "يدوم" بشغف وإصرار إنه يخلي المشاعر تدوم طول العمر! 

"يدوم" هو أونلاين شوب لبيع المجوهرات بيعزز معنى الروابط اللي تقدر تدوم طول العمر، بدأته مروة عوض عبداللاه، بروح كلها شغف وعزيمة إنها تعمل براند يقدر يخلي الستات عندها ثقة في نفسها وتزدهر وهي لابسة قطعة مجوهرات معمولة مخصوص ليها وفيها جزء من شخصيتها.

 

الأول عرفينا بنفسك
انا مروة عوض عبداللاه، 41 سنة حاصلة على درجة البكالوريوس في الفنون التطبيقية و شهادة ال HRD لتقييم الألماس.

احكيلنا منين جتلك فكرة يدوم؟

كنا حريصين إننا نلاقي الشيء اللي فعلاً بيدوم طول العمر، كلنا بندور على الحب، الطمأنينة، الضحكة والرباط الحقيقي للعلاقات.

بنسعى كبشر إننا نلاقي الأمان وإننا نختار حاجة تستاهل نستثمر فيها وتكون تستحق وقتنا ومجهودنا وكمان فلوسنا.

انا مقتنعة إننا مش بنبيع منتجات إحنا بنبيع قيمة وفايدة، ومن هنا جتلي فكرة بداية براند بيعزز معنى الإرتباط إللي بيدوم.

براند يقدر يترجم مشاعر العملاء و يحفظ لحظاتهم الغالية في شكل مجوهرات تتورث لأجيال، وده هيخليها تدوم طول العمر وتحفظ مشاعرهم و ذكرياتهم.

و من هنا جت فكرة "يدوم"

منين بيجيلك الإلهام لكل قطعة مجوهرات بتعمليها؟

من عملاءنا، يدوم بدأت بإستراتيجية بتتمحور حوالين العملاء، الألهام بيحي من مشاعر العملاء واحتياجاتهم؛ دايمًا فيه تركيز على ترجمة أمنياتهم واحتياجاتهم وتحقيقها. زي إنك ترسمي اللي بيدور في دماغك في شكل قطعة مجوهرات فريدة ومختلفة عن أي قطعة تانية تناسب كل مناسبة وكل سن وكل ستايل.

في رأيك إزاي المجوهرات بتساعد الستات إنها تعبر عن نفسها؟

المجوهرات بتلعب دور كبير جداً في حياة الستات من آلاف السنين، كل الحضارات القديمة قدّرت المجوهرات وكانت بتستخدم عشان تبرز الجمال الطبيعي للي بتلبسه، قطع مختلفة كانت بتتلبس عشان ترمز للأمان والحكمة و الرقي.

كتير من الستات بتحب تلبس المجوهرات عشان تعبر عن الأنوثة أو تبين وضعها الاجتماعي، المجوهرات كمان بتساعد الست تحس بالثقة والجمال.

أحنا مقتنعيين إن كل قطعة مجوهرات بتعبر عن كل مود وبتكون أفضل من أي كلمة، وانها مش حاجة زيادة ولكنها شيء أساسي لأي مناسبة ولوك كامل.

ورينا أقرب قطعة لقلبك واحكيلنا لو في قصة وراها.

ده عقد رابطة يدوم، ومستوحى من اللوجو الخاص بينا و من معنى البراند، صممناه بحب عشان يوضح العلاقة اللي بتربط الناس من خلال رابطة أو علاقة أقوى من الوقت.

 

 

 

ايه الصعوبات اللي واجهتك لما بدأتي البيزنس الخاص بيكي؟

إنك تبدأي بيزنس برسالة عميقة و رؤية واضحة ومختلفة عن معظم المنافسين بتوعك، بيكون في صعوبة وتحدي إنك تقدري توصلي رسالة البراند بتاعك وتبيني القيمة اللي هتعود عليهم من خلالك عشان يقدروا يقربوا منك، كمان الصعوبات المالية سواء بتبدأي البراند أونلاين أو أوفلاين، بيكون في مجهود كبير عشان تقدري توصلي قيم البراند الخاص بيكي بالشكل اللي انتي عيزاه.

احكيلنا بتحسي بأيه لما بتلاقي حد من المشاهير لابسه قطعة من "يدوم".

أكيد إننا نحصل على ثقة ورضا المشاهير شيء بيدعو للفخر، وبنكون حريصين إننا نعمل قطع خاصة بتناسب ذوقهم ومشاعرهم وتعكس شخصيتهم المميزة، بيكون شيء رائع إننا نشوف قطع من يدوم بتتكلم عنهم وبتعكس شهرتهم و رقيهم.

 

مين أكتر حد دعمك خلال رحلة البراند بتاعك؟

حبايبنا اللي اثبتوا قوة العلاقة بينا، و أصحابي المخلصين اللي كانوا موجودين خطوة بخطوة، عيلتي اكيد وعلى رأسهم اختي وشريكتي سارة.

 

لو عندك أطفال، إزاي بتقدري تاخدي بالك من احتياجتهم جنب احتياجات البراند؟

صعب إنك تلعبي كل الأدوار، بس بحاول انظم وقتي بحيث كل المشاوير تكون في الوقت اللي بيكونوا موجودين في المدرسة ، كمان بخليهم يشاركوا معايه في كل التفاصيل، عشان مكنش بعيدة عنهم، واصريت إني اشاركهم هدف "يدوم" عشان يكوم قيمة للأسرة.

 

إزاي بتوازني بين حياتك الشخصية وحياتك العملية؟

حبي لشغلي مش مفصول عن حياتي الشخصية، ولما بتعملي شغلك بشغف وبتعملي حاجة بتحبيها فعلاً وبتشوفي تأثيرها الإيجابي على الناس بتزدهري! 

و طاقة كبيرة بتتخلق جواكي بتخليكي تحبي حياتك وبتخليكي تستمتعي بكل تفصيلة في حياتك الخاصة.

ممكن يكون عندي وقت أقل بس ده بيخليني عندي رغبة اكبر اني اعيش و استمتع بلحظاتي دلوقتي.

إزاي بتدعمي الستات من خلال البيزنس الخاص بيكي؟

يدوم ليها اتجاه واضح من البداية وهو دعم الستات ومساعدتهم إنهم يشوفوا جمالهم الداخلي، ده بيبدأ من خلال المحتوى المحفز و الداعم ليهم، كمان من خلال ترجمة أو تحويل احتياجتهم لحقيقة، واننا بنقدملهم فرص إنهم يلمعوا ويتألقوا.

 

قوليلنا رأيك في دعم البراندز المحلية في مصر؟

أكيد دعم المتتجات المحلية في مصر شيء مهم خصوصًا الفترة دي لان معظم المشاريع الصغير بتشتغل و بتعتمد بس على شخص واحد فدعمنا للمشاريع المحلية بيعمل تأثير قوي جداً عليهم، كمان الكلمة من أساليب التسويق المهمة لأي مشروع صغير، والبيزنس بتاعنا بيحرص على نشر الكلمة، الحب، ودعم بلدنا.

 

ايه افضل جزء في رحلتك مع يدوم؟

افضل جزء كان مرحلة تصديقنا لنفسنا ولانتصارتنا الصغيرة، وتقبل ان عادي يكون في تقلبات و لكن الافضل دايمًا لسه مجاش!

إحنا استمتعنا بنضالنا خصوصًا في البداية لأنه هو اللي خلانا موجودين هنا دلوقتي، إننا نوصل هنا دلوقتي مكنش سهل ولكننا تحدينا نفسنا عشان نوصل.

احنا احترمنا مرحلة التعلم والتجربة وقبلنا ان عادي منكنش مثاليين وان النجاح مش هو النهاية والفشل في اي مرحلة مش معناه فشلنا.

افضل جزء بالنسبالي في رحلتي مع يدوم هو استمتاعي بالرحلة نفسها.

 

ايه مخططاتك الجاية لـ "يدوم"؟

إننا نقدر نفتح فروع ليدوم في كل أنحاء مصر ونقدر ننول رضا عملائنا عشان نقدر نوصل ل 30% من السوق المستهدف خلال ال 5 سنين الجاية، كمان أننا نتوسع برا مصر، إحنا بدأنا نوصل لدبي من خلال المنصات الأونلاين الخاصة بينا.

ايه اهم نصيحة تحبي تقديمها للستات اللي حابه تبدأ المشروع الخاص بيها؟

إنها تبدأ، حتى قبل ما تكون جاهزة. وانها تثق في نفسها و تصدق إنها مميزة وتقدر تحرك جبال بروحها المذهلة. ومتخفش من حاجة وتصدق إن عادي ان مش كل حاجة لازم تبقى مثالية وأن كفاية غنها تبقى أفضل نسخة من نفسها.