08 أغسطس 2022 445 0  

خروجك من علاقة مؤذية بياخد منك وقت كبير للتعافى وكل الناس بتبدأ تحكيلك إزاي تتجاوزي العلاقة دي، لكن محدش بيتكلم عن إزاي نتعافى بعد طلاق الأهل. كأنه حاجة عادية ومش هتأثر غير على طرفين العلاقة وبس أو بما إنك شخص كبير وفاهم الموضوع عادي، لكنه للأسف بيبدأ يأثر عليكي وعلى علاقتك بكل اللي حواليكي حتى وانتي مش واخدة بالك. سواء كان طلاق أهلك دة جيه بعد عذاب كتير أو إنتهى بالتفاهم بين الطرفين.
"بعد طلاق أهلى محدش جه وفهمني إزاي أتعافى من انفصالهم كأني مليش علاقة بالموضوع وأنا يادوب طرف ثانوي في الحدوتة لحد ما بدأت علاقتي بالراجل اللي بحبه تتغير."

الطلاق في حد ذاته مش الأزمة، الموضوع بيبدأ من قبل الطلاق بكتير. بتبدأي تشوفي خناقات وعدم تفاهم وتحكمات وممكن ضرب وإهانة في الوقت اللي وعيك بالعلاقات بيبدأ يتشكل. وبدل ما تكبري وانتي فاهمة أهمية ومعنى الجواز ممكن تكرهي الرجالة ومنظومة الجواز كلها، أو يتكون عندك وجهة نظر مشوهة عن الجواز وتكوني فاكرة ان اللي شوفتيه في بيتك هو الطبيعي واللي بيحصل في كل مكان. فتروحي تتعلقي بشخص مش مناسب ليكي، أو تتعلقي بفكرة فارس الأحلام على الحصان الأبيض اللي هيجي ينقذك من كل اللي شوفتيه في حياتك ويكون هو العوض. فتبدأي تدوري في كل مكان عن العوض ده وعقلك يهيألك حقيقة مش موجودة في الشخص اللي قدامك وتصدقيها وتلاقي نفسك بعد كام سنة بتعيدي نفس الحدوتة مرة تانية لأنك مختارتيش صح من البداية.

ودة طبعًا مش في جزء العلاقات العاطفية بس، لكن هتلاقي حتى علاقتك بالناس القريبة منك زي أخواتك و اصحابك وزمايلك في الشغل بتتكون غلط لأن زي ما قولنا الموضوع مش بيبدأ بالطلاق الموضوع بيبدأ من بدري جداً في وقت تكوين شخصيتك، ممكن علاقة أهلك قدامك تكون شخصيتك بطرق مختلفة فتكبري وإنتي شخص مبيعرفش ياخد قرار في حياته، أو شخص بيقبل كل حاجة حتى لو هتيجي عليه، أو شخص عدواني مبيقبلش حد يقوله نص كلمة مش على هواه او اشكال تانية كتير..

على قد الأذى بيكون التعافي أصعب

بعد الطلاق الصورة بتبدأ توضح قدامك لأن اللي كان بيحصل بيقل كتير وفي حالات تانية ممكن يختفي فبتبدأي تستوعبي اللي بيحصل الأول وبتبدأي تمري بمراحل مختلفة.
**لكن مش شرط تمري بكل المراحل لأن في أبناء بيكونوا فاهمين أن أهلهم مؤذيين أو مثلاً قبل الطلاق أهلك بيكونوا بس مش متفاهمين ومبيحصلش مشاكل كبيرة كتير، فمش شرط تمري بكل المراحل كل علاقة بتختلف مش مشاكلها وكل شخص قدرته على إدراك الموقف بتختلف.**
في البداية بتفضلي تسألي نفسك اسئلة كتير زي إزاي وليه ده حصل وحياتك بعد كدة هتبقى عاملة إزاي، طب هل الل كنتي في دة طبيعي ولا كان في حاجة غلط، أو تسألي نفسك مين اللي كان غلطان وفي أوقات بتبدأي تلومي نفسك وتسألي هل كنتي سبب من الأسباب اللي وصلت علاقتهم لكدة؟ بتبدأي تغضبي وترمي بغضبك دة على كل اللي حواليكي لأنك لسة مش قادرة تستوعبي إن الموضوع خلص فعلاً وهتبطلي تسمعي وتشوفي كل اللي كان بيحصل.
** في فترة الغضب مهم أننا نحكي لحد قريب مننا أو لأخصائي نفسي عشان كتمان الغضب والحزن جواكي هيخلي نفسيتك أسوأ وهيطول في فترة التعافي، وهنتكلم قدام شوية عن مرحلة التعافي والمفروض نعمل ايه بالظبط.

بعد الطلاق علاقتك بنفسك وباللي حواليكي بتتغير وبتشوفي حاجات مكنتيش شايفاها قبل كدة وممكن عقلك يقنعك أن كل العلاقات مش دايمة وأن مصير علاقتك باللي حواليكي تنتهى فتبدأي فعلاً تبعدي عن الناس قبل ما هما يبعدوا عنك أو لو حصل أي سوء تفاهم بينك وبين أصحابك مبتحاوليش تصلحيه عشان مقتنعة أن كله زي بعضه ومفيش حاجة هتدوم أو إنك شخص غير مرغوب فيه. كلها حاجات مش حقيقية عقلك بيدافع عن نفسه بيها حاولي متستسلميش للأحاسيس دي.

في المرحلة دي ممكن علاقتك بالشخص اللي بتحبيه تبوظ تمامًا أو تبقى أحسن بكتير، طب ده بيحصل إزاي؟

في المرحلة الأولى مع وجود المشاكل زي ما قولنا ممكن تحبي شخص مؤذي بسبب كل الظروف اللي مريتي بيها -الشخص المؤذي أو النرجسي مش شرط يكون واضح في البداية- وبتفضلي معاه لفترة طويلة وبتتعلقي بي جداً، بعد طلاق أهلك هتبدأ الشكوك جواكي تجاه نفسك وتجاه اللي حواليكي تكتر، الخوف من الأنفصال هيبدأ يخليكي تتصرفي تصرفات مش شبهك، أو أنك تبدأي تركزي اكتر في العلاقة عشان خايفة تكرري غلط أهلك مرة تانية.  في المرحلة دي مع وجود الشخص الغلط علاقتك بيه هتدمر لأنك في البداية اخترتي شخص غلط.

** لو العلاقة باظت متشكيش في نفسك، إعرفي ان ده الأحسن لأنها لو كملت مكنتيش هتكوني مرتاحة في حياتك.

أو إنك تكوني من البداية مع الشخص الصح ووقتها هيفضل جمبك ويدعمك في كل خطوة ووقتها علاقتك بيه هتكون أحسن بكتير وكمان علاقتك بنفسك.

• مراحل التعافي

زي ما مرينا بالمراحل والأحاسيس اللي بتحسيها بسبب طلاق الأهل لازم نتكلم عن أهم مرحلة وهي مرحلة التعافي:

التعافي بيمر بمراحل كتير أولهم
- مرحلة الإنكار وعدم التصديق، بتحسي أن كل ده محصلش او أن هيجي وقت ويتغيير.
- بعدها بتيجي فترة الغضب زي ما اتكلمنا عنها بتكوني غضبانة وبتلعني في كل حاجة في حياتك
-بعدين بتبدأ مرحلة الأكتئاب وعايزة اقولك ان طبيعي تدخلي في حالة من الأكتئاب بعد طلاق الأهل او الخروج من علاقة مؤذية في الرحلة دي بتفقدي الأمل في المستقبل كله والعلاقات أو مبتقدريش تحسي بالحب والإنتماء لأي حد، كمان ممكن تبدأي تشكي في كل حاجة حلوة في حياتك.
المرحلة دي هي المرحلة الأصعب في مراحل التعافي لأن الحياة مبيبقاش ليها معنى وبيملانا اليأس وبتحسي انك مش قادرة تعملي أي حاجة في يومك حتى شغلك بتعمليه بصعوبة.
مهم في المرحلة دي نعرف أنها مرحلة وهتعدي ومنسمعش لأفكارنا السودة اللي بتحاصرنا ومهم نطلب المساعدة في المرحلة دي من حد من صحابنا أو حد بترتاح تتكلم معاه أو متخصص نفسي عشان تبدأ المرحلة الأهم والخطوة الأولى لتجاوز الألم.

- مرحلة القبول دي أهم خطوة في خطوات التعافي وبتيجي بعد مرحلة الأكتئاب في المرحلة دي بنبدأ نقبل بكل اللي حصل في حياتنا سواء قبل أو بعد طلاق الأهل وكل الأذى اللي اتعرضناله وبنبدأ نسمي المشاعر بأسمائها الحقيقية وبنقدر نشوف الحلو في الحياة واحدة واحدة زي إنك تشوفي الخير من الطلاق ده أو البعد عن الأشخاص اللي سببولك الأذى وبتقدري تصدقي إنك تستحقي الأفضل وتستحقي حياة من غير كلكعة.

- متنسيش تطلبي الدعم من اللي حواليكي وتحكي اللي حاسة بيه لأننا مش دايمًا هنقدر نشوف النور اللي في اخر الطريق لوحدنا، هنحتاج حد يقولنا ده و يقنعنا بيه. و مش دايمًا الدعم معناه إنك تلاقي حد عارف اللي مريتي بيه بالظبط، ممكن بس وجود حد جمبك في المرحلة دي وبيحبك بجد و قادر يستوعب إحساسك يكون كفاية.

- مهم إنك تكتبي اللي حاسة بيه عشان تطلعي الطاقة اللي جواكي

- إعملي حاجات بتحبيها وإكسري حاجز الخوف من التجارب الجديدة كل دة هيخليكي ترجعي أحسن من الأول 

في النهاية أحب أقولك أنا عارفة قد ايه كل مرحلة صعبة وكل خطوة بتاخد مجهود مننا كبير بس الأكيد إن كل حاجة بتعدي. حاولي متخسريش نفسك في وسط كل اللي مريتي بيه وخليكي عندك ثقة في نفسك وتقبلي حزنك، كل حاجة بتعدي وهتبقي احسن!