22 مارس 2021 1972 0  

إتباع الشغف هو طريق طويل من النجاحات والاخفاقات. وكمان بيتطلب مننا أننا نخرج بره مساحة الأمان ونكتشف كل جديد. وده المبدأ اللي قامت عليه "ذات". ومعانا آلاء محفوظ بنفسها تحكي لنا أكتر عن قصتها. 

في البداية، كلمينا عن نفسك. عندك كام سنة؟ ودرستي إيه؟

أنا آلاء محفوظ عندي ۳۳ سنة. درست هندسة ديكور  في جامعة إسكندرية. من بداية أول سنة في الكلية، وأنا محبتهاش وعرفت أن مش ده شغفي. خلينا نقول أن شغفي الحقيقي من صغري كان العناية بالبشرة.

وبالنسبة لمشروعك، كلمينا عنه أكتر؟ أزاي بدأتي؟

في سنين مراهقتي، كنت بعاني من مشاكل كتير في بشرتي زي الحبوب وآثار الحبوب والتصبغات.
وده كله آثر على شخصيتي وثقتي بنفسي. ومن هنا كانت البداية، لأن عيلتي موجودة في مجال الصيدلة من ٥٠ سنة، فكان عندي فرصة أجرب تركيبات ومواد طبيعية كتير على بشرتي.
وبعد فترة من إتباع روتين معين، بشرتي أتحسنت وبالتالي عزز ثقتي في نفسي جدًا.
وده كان وقت الخطوة التانية، دخلت في الشغل مع أهلي وأخدت تدريبات في شركات متخصصة في المجال. كمان درست علم الأمراض الجلدية علشان أفهم طبيعة الجلد.
وأخيرًا، قررت أبدأ شركتي الخاصة لمنتجات العناية بالبشرة. بجانب أنه كان شغفي، أنا أعرف كتير عن السوق والمنافسين.

لكن، ليه "ذات"؟ وبيرمز لإيه؟

كلمة "ذات" في اللغة العربية معناها النفس الحقيقية.
أنا بشوف دايمًا أنا كل ست لازم تهتم بنفسها؛ لأن كل شخص في حياتنا هو مؤقت: أولادنا هيكبروا ويختاروا طريقهم في النهاية.
وبالتالي أحنا محتاجين نهتم بنفسنا وبشرتنا جزء مننا. لو مهتمتيش، بشرتك هتعجز بسرعة.
مهما كانت الست مشغولة، كفاية تخصص عشر دقايق قبل النوم لروتين معين للعناية بالبشرة، وده هدفي من "ذات".
هى شكل من أشكال العناية بالنفس ورفاهية متاحة لكل ست.

كلمينا عن منتجاتك؟ وليه هى مميزة عن باقي منتجات السوق؟

في "ذات" عندنا ٤ منتجات، هى منتجات بسيطة لكن فعالة.
غسول للوش وسيرم التقشير وكريم مرطب وكريم للعيون.
كل المنتجات فيها فيتامينات وحمض الهيالورونيك علشان تقدر تعالج مشاكل الجلد وتساعده أنه يكون صحي أكتر.

منتجات "ذات" مختلفة عن أي منتجات في السوق لأننا صنعناها علشان تكون منتجات مصرية ١٠۰% بجودة عالية تنافس في السوق العالمي.
أحنا بنتأكد أنها منتجات طبيعية قدر الإمكان وده عن طريق أننا بنستخرج المادة الفعالة من المواد الطبيعية.
وبعدها بيتم تركيزها بشكل عالي: علشان نقدر نصنع منتج يساعد فعلًا في حل المشكلة.
التغليف كمان كان حاجة أخدناها في الاعتبار.
الأزايز صديقة للبيئة وممكن كمان الستات تعيد استخدامها مرة تانية، الأستيكرز كمان جودتها عالية. أنا عايزة أقدم أفضل تجربة لكل ست في كل مرة تستخدم فيها منتجات "ذات".

طيب، قولي لنا إيه منتجك المفضل في "ذات"؟

أنا ومجموعة وصحابي جربنا المنتجات لفترة علشان نتأكد أنها فعالة. فأنا بحبهم كلهم.
لكن لو مضطرة أختار واحد هيكون سيرم التقشير.
أنا عملت تقشير في عيادات وفي البيت، لكن هو خطير.
لأنه ممكن يسبب حرق أو تصبغات دائمة في الجلد. وبالتالي كان حلمي أني أعمل منتج للتقشير يكون آمن وفي متناول كل ست.
هو منتج مميز ومفيش أي منتج شبهه في السوق.

إيه هى خطط توسعك؟ وإيه أهدافك لسنة ۲٠۲١؟

أنا بتمنى انتشار أكبر، أنا عايزة منتجاتي تكون موجودة في الصيدليات في كل المحافظات.
بتمنى أوصل لكل ست بتهتم ببشرتها وعايزة تظهر ذاتها الحقيقية وأنها تجرب منتجات "ذات" وأسمع منهم رد فعلهم.

وتحبي تقولي إيه لكل البنات والستات؟

عايزة أقول لكل بنت أنها تكون نفسها وتسمع لطموحها.
في أوقات مجتمعنا بيفرض على الست أنها تظهر أو تتصرف بشكل معين.
لكن على العكس، أحنا لازم نشجع كل ستات على أي حاجة اختاروا يعملوها.
سواء اختاروا يشتغلوا أو يكونوا ربات بيوت.
بتمنى نكسر الصور النمطية أن النجاح له شكل واحد بس.
كل ست ممكن تكون ناجحة بطريقتها.

لو عندك قدرة أنك تعملي تغيير بشكل فعال يساعد في تحسين حياة الستات، هيكون إيه هو التغيير ده؟

زي ما قولت قبل كدة، أنا عايزة أكسر الصور النمطية اللي الستات بتواجهها كل يوم في المجتمع. كل ست بتكتب قصتها هى وبتعيش حلمها. وبالتالي، لو عندي القدرة على التغيير، هاختار أني أقف قدام الأحكام اللي الستات بتضطر تواجهها.

استمتعنا جدًا بحوارنا مع آلاء محفوظ نتمنى تكون قصتها ألهمتكم أنكم تسعوا ورا شغفكم. شاركونا آرائكم في الكومنتات.